ကိုယ့်ထံမှာ အကြောင်းအမျိုးမျိုးနဲ့ ဆက်နွယ်ပတ်သက် လာသူတွေကို အဆင်ပြေ ချောမွေ့သွားအောင် သူတို့ရဲ့ လိုအင်ဆန္ဒ များကို စာနာစိတ် ပြည့်ပြည့်၀၀ နဲ့ ဖြည့်ဆည်းပေးဘူး ပါရဲ့လား။
အမှတ်မဲ့ပါဘဲ။
တာဝန်ရှိလို့(သို့မဟုတ်)အားနာလို့၊မကောင်းတတ်လို့(သို့မဟုတ်)ကြောက်လို့ ကူညီပေးရတာတွေ
ရှိနိုင်ပါတယ်။ ကူညီဘို့ကို လေးလေးနက်နက် တွေးပြီး လှိုက်လှိုက် လုပ်ကိုင်ပေးသူမျိုး တော့နည်းပေလိမ့်မယ်
ထင်မိပါတယ်။
အမှုမဲ့ အမှတ်မဲ့ နဲ့ သာမန်ကာလျှံကာ ကူညီပေးမိသွားတာမျိုး အဖြစ်များပါလိမ့်မယ်တယ်။
ကိုယ်တွေ့လေးတခု ပြောပြချင်ပါတယ်။
ပုဂံမှာပါ။ ရောက်တဲ့ညမှာ ကားက ၀ါယာရှော့ဖြစ်ပြီးထိုးရပ်သွားပါလေရော။ မလုပ်တတ်မကိုင်တတ် ဖြစ်နေချိန်မှာ ဆိုက်ကားဆရာလေး တစ်ယောက် ရောက်လာပြီး ၀ပ်ရှော့ဆရာခေါ်ပေးတာ၊ ကားကို ၀ပ်ရှော့
ဆွဲယူဘို့ကားတစ်စီးငှါးပေးတာ စသဖြင့် လိုအပ်တာမှန်သမျှ ဒိုင်ခံလုပ်ပေးရှာပါတယ်။ သူ့ကို နုတ်နဲ့ဖွင့်ဟပြီး
ဘာတခုမှ အကူအညီ မတောင်းခဲ့ရပါဘူး။
ကျေးဇူးတင်တဲ့စိတ်ရော ကြက်သီးမွေးညင်းထတဲ့ထိကြည်နူးစိတ်ရော ဖြစ်ပေါ်ခဲ့ရပါတယ်။
အသိတရားတစ်ခုလည်း ရင်တွင်းမှာကိန်းအောင်းပါလာခဲ့သလို မပျက်မပျယ်ရှိလေအောင် ဂရုဓမ္မစိုက်ထုတ်ပြီး
မွေးမြူထားပါတယ်။
သူတပါး ရဲ့လိုအပ်ချက်ကို ကိုယ်ကြိုးမဖက်ဘဲ ပြည့်ဝအောင် ဆောင်ရွက်ပေးသူ ဘယ်လောက်များများ ရှိပါ့မလဲ
ဆိုပြီး ဆက်တွေးကြည့်မိပါတယ်။
သူတပါး အဆင်မပြေဖြစ်အောင်၊ အထစ်ထစ် အငေါ့ငါ့ ဖြစ်အောင်၊ ကသိကအောင့်ဖြစ်အောင်၊ အခက်ခက် အခဲခဲတွေ့ကြုံရလေအောင် လုပ်နိုင်ပါမှ လာဘ်လာဘ ရွှင် ပြီး ကြီးပွါးချမ်းသာ နိုင်ကြတဲ့
နေရာဌာန အသီးသီး ၊ လူတန်းစား အလွှာ အသီးသီး က လူများ ကို စဉ်းစားမိတဲ့ အခါ အထိတ်တလန့် ဖြစ်ရပါတယ်။
လူနာကို စိတ်ချမ်းသာအောင် မဆက်ဆံတတ်တဲ့ ဆရာဝန်တွေ
လူနာကို မကြင်နာတတ်တဲ့ သူနာပြုတွေ
ခရီးသည်ကို မစာနာ မထောက်ထားတဲ့ စပါယ်ရာ၊ ဒရိုင်ဘာတွေ
ဈေးဝယ်သူအပေါ် ညစ်ချင်တဲ့ ဈေးသည်တွေ
အမှုသည်ကို ကြံရည်ညှစ်သလို ညှစ်တဲ့ ရှေ့နေတွေ၊ တရားသူကြီးတွေ
သေးတဲ့အမှုကြီးအောင်၊ ကြီးတဲ့အမှု ရှုပ်အောင် လုပ်တတ်တဲ့ ရဲတွေ
လာဘ်မရရင် ခက်ခဲ ကြပ်တည်းအောင် လုပ်တဲ့ အမှုထမ်း အရာထမ်းတွေ
ကိုယ့်ဆွေမျိုးကောင်းစားရေးရှေးရှုတဲ့ အရာရှိကြီး ငယ်တွေ
ပညာပေးရေး ထက် ဥစ္စာရရေး ဦးစားပေးတဲ့ ဆရာ ဆရာမတွေ
စာရင်းချကြည့်ရင် မဆုံးနိုင်အောင်ပါဘဲ။ လောကကြီးမှာ လူကောင်းသူကောင်းတွေ နည်းပြီး မသူတော်တွေ
ပေါလှချည့်လား လို့ အောချရမလောက်ပါဘဲ။
Subscribe to:
Post Comments (Atom)
No comments:
Post a Comment